Couplet-0383

குறள் எண் Couplet No	பால்	இயல்	அதிகாரம் Chapter
0383	பொருள்	அரசியல்	இறைமாட்சி Qualities of King

தூங்காமை கல்வி துணிவுடைமை இம்மூன்றும் 

நீங்கா நிலன்ஆள் பவற்கு 

தூங்காமை கல்வி துணிவு உடைமை இம் மூன்றும்
நீங்கா நிலன் ஆள்பவற்கு.


பரிமேலழகர் உரை



நிலன் ஆள்பவற்கு- நிலத்தினை ஆளும் திருவுடையாற்கு;

தூங்காமை கல்வி துணிவுடைமை இம் மூன்றும் நீங்கா- அக்காரியங்களில் விரைவுடைமையும், அவை அறிதற்கு ஏற்ற கல்வி உடைமையும், ஆண்மை உடைமையும் ஆகிய இம்மூன்று குணமும் ஒருகாலும் நீங்கா என்றவாறு.


பரிமேலழகர் விளக்கம்:



கல்வியது கூறுபாடு பின்னர்க் கூறப்படும். ஆண்மையாவது, ஒன்றனையும் பாராது கடிதிற் செய்வது ஆதலின் அஃது ஈண்டு உபசார வழக்கால் துணிவு எனப்பட்டது.உம்மை இறந்தது தழீஇய எச்சவும்மை. இவற்றுள் கல்வி ஆறங்கத்திற்கும் உரித்து; ஏனைய வினைக்கு உரிய; 'நீங்கா' என்பதற்கு மேல் எஞ்சாமைக்கு உரைத்தாங்கு உரைக்க.